I CINEMA POR MULLERES A CORUÑA 2023

No marco das actividades organizadas polo Concello da Coruña en torno ao día Internacional da Muller 2023, arrinca a I Mostra Internacional de Cinema por Mulleres A Coruña, producida por el Festival Cine por Mujeres Madrid, que terá lugar do 22 de marzo ao 2 de abril de 2023 en Los Cantones Cines, Centro Comercial Cantóns Village. Con ela, preténdese achegar ao público da cidade unha selección das máis recentes longametraxes internacionais e nacionais dirixidas por mulleres, realizadas entre 2021 e 2022.

As 20 películas que se proxectarán xa formaron parte da Competición Nacional e Internacional da V edición do Festival de Cine por Mujeres Madrid, que tivo lugar do 25 de outubro ao 6 de novembro do 2022. Entre elas, atópanse as dúas películas gañadoras: a multipremiada “Cinco Lobitos”, da directora española Alauda Ruiz de Azúa -que conquistou os Forqué, os Feroz e recibiu 3 premios Goya: Mellor dirección Novel, Mellor actriz protagonista, Mellor actriz de reparto- e “Estación Catorce” da directora mexicana Diana Cardozo -gañadora da competición da V edición do Festival Cinema por Mulleres Madrid como Mellor Película de 2022-.

As 10 longametraxes internacionais proveñen de Alemaña, Colombia, Eslovaquia, Estados Unidos, Dinamarca, Marrocos, México, Siria, Suecia e unha coprodución de Turquía e Ucraína. Todas elas, estreadas en España no marco da V edición do festival, competiron polo Premio á Mellor Película 2022, cuxo xurado internacional estivo composto por Irene Escolar, actriz (España), Ana Katz, directora (Arxentina) e Víctor García León, director (España).

A selección das 10 películas españolas, realizadas entre 2021 e 2022, tamén se compón de longametraxes multi premiadas e seleccionadas en diversos festivais nacionais como Valladolid-SEMINCI, o Barcelona FilmFest, o Festival de Sitges ou o Festival de Málaga, e internacionais como Cannes, Berlinale ou Sundance. Trátase dnha variada selección de ficción -drama, comedia familiar, terror, experimental- e documental, que ofrece ao público coruñés unha oportunidade única de poñerse ao día sobre a recente produción cinematográfica do noso país dirixida por mulleres. Todas as longametraxes competiron polo Premio á Mellor Película Española 2022 do Festival Cine por Mujeres Madrid, dirimido por críticos cinematográficos da Asociación Premios Blogos de Ouro.

A I Mostra Internacional de Cinema por Mulleres A Coruña está patrocinada por Sidras Maeloc, que colabora co Festival Cine por Mujeres Madrid desde a súa primeira edición en 2018: “Para MAELOC é un exercicio lóxico de coherencia o seguir apoiando por sexto ano consecutivo este Festival, aínda máis cando este ano, por primeira vez, expándese á nosa terra cunha edición inédita en Galicia”, indican dende o departamento de comunicación.

O proxecto súmase á oferta cultural anual dunha cidade que se enorgullece do legado das numerosas coruñesas que destacaron en diversas áreas da cultura a escala nacional e internacional: desde a actriz María Casares ata as escritoras Emilia Pardo Bazán e Juana de Vega, pasando pola pintora Lolita Díaz Baliño ou a lendaria heroína María Pita.

Con esta iniciativa, o Concello da Coruña, en colaboración coa organización do Festival Cine por Mujeres Madrid e Sidras Maeloc, amplía a súa variada oferta cultural e a súa aposta por unha cinematografía de calidade e diversa que, en ocasións, a pesar de ser multi-premiada por crítica e público, e de recibir grandes recoñecementos nacionais e internacionais, non adoita chegar á distribución comercial en salas. Este programa complementa outras iniciativas como as desenvolvidas polo Concello a través das súas propias salas de cinema do Fórum Metropolitano, á vez que prosegue coas súas accións políticas de igualdade, visibilizando a importancia e presenza da muller, neste caso, no ámbito da cultura e da industria cinematográfica.