II CINEMA POR MULLERES A CORUÑA
PROMOVE:
PATROCINA:
PROMOVE:
PATROCINA:
XOVES 22 DE FEBREIRO -
SÁBADO 9 DE MARZO 2024
MESA REDONDA:
“Galicia: nós tamén diriximos longametraxes”
Teatro Colón (Avda. da Mariña, num. 7A, 15003 A Coruña)
Xoves 22 febreiro ás 19.00 h
Entrada gratuita
PROXECCIÓNS:
Cantones Cines
Centro Comercial Cantones Village, Avda. do Porto da Coruña, 3, 15003. A Coruña
Dous pases diarios en febreiro: venres 23, sábado 24, mércores 28 e xoves 29
Dous pases diarios en marzo: venres 1, sábado 2, mércores 6, xoves 7, venres 8, sábado 9
Horarios: 18.00 h e 20.30 h
Prezo de entrada: 4,50 €. Con desconto: Carné Xove, maiores 65 anos, familias numerosas e persoas desempregadas: 3 €
Todas as películas serán proxectadas en V.O.S.E.
Salvo indicación, os pases serán presentados pola crítica cinematográfica Andrea Franco.
Presentación do II Cinema por Mulleres A Coruña
mostra internacional de longametraxes
En marzo de 2023, o Concello da Coruña organizou o I Cinema por Mulleres A Coruña. Este 2024, volve apostar polo cinema dirixido por mulleres, “como unha acción cultural de primeira orde para a necesaria posta en valor do traballo cinematográfico de moitas mulleres”, indicou a alcaldesa da cidade, Inés Rey.
Un ano máis, a mostra conta co patrocinio da coñecida marca de sidra galega Maeloc, que apoia a creación audiovisual e dálles visibilidade ás mulleres profesionais do sector.
Esta mostra internacional de longametraxes estará composta por unha coidada selección de 20 películas, 10 internacionais e 10 españolas dirixidas por mulleres e realizados entre 2022 e 2023, os cales participaron na Competición Internacional e a Competición Española do VI Festival Cinema por Mujeres Madrid, que tivo lugar do 24 de outubro ao 5 de novembro de 2023. Proveñen de países tan variados como Lituania, Bélxica, Francia, Marrocos, Reino Unido, Corea do Sur, Canadá, Grecia, México, Alemaña, Israel, Países Baixos, Chile, Suecia e, obviamente, 10 españois.
Con esta mostra, o público coruñés poderá gozar dunha variada selección de películas de ficción e documental, tendo unha oportunidade única de poñerse ao día sobre a recente produción cinematográfica internacional dirixida por mulleres, dado que o 50% das longametraxes serán estreas absolutas na cidade: 6 internacionais e 4 españois.
Entre as películas internacionais proxectaranse How To Have Sex, de Molly Manning Walker – gañadora do Premio a mellor película 2023 do VI Festival Cinema por Mujeres Madrid, cuxo xurado internacional estivo composto por Ana Endara (directora; Panamá), Natalia de Molina (actriz; España) e Vicente Molina Foix (escritor, crítico de cinema e director; España), ademais do Premio do xurado novo e Premio a mellor directora novel de Valladolid-SEMINCI, gañadora do Premio Un Certain Regard do Festival de Cannes 2023 e Premio European discovery-Prix Fipresci na European Film Academy; Animalia, de Sofia Alaoui, gañadora do Premio á Visión Creativa do Festival de Sundance 2023; El eco, de Tatiana Huezo, gañadora do premio á Mellor Dirección e Mellor Documental en Berlinale 2023; La memoria infinita, de Maite Alberdi, gañadora do Premio World Cinema - Documentary en Sundance 2023; Slow, de Marija Kavtaradze, gañadora do Premio á Mellor dirección-drama en Sundance 2023.
A selección das 10 longametraxes españois, componse tamén de películas multipremiadas, como O Corno, de Jaione Camborda, gañadora da Cuncha de Ouro no Festival de Cine de San Sebastián 2023; La Singla, de Paloma Zapata, gañadora do Premio Feroz Arrebato de non ficción ou 20.000 especies de abejas, de Estibaliz Urresola, gañadora do Premio Feroz á Mellor película dramática e Mellor actriz de repartición; ademais doutras películas seleccionadas en diversos festivais nacionais como Valladolid-SEMINCI, San Sebastián, Málaga e en festivais internacionais como Cannes, Berlinale ou Guadalaxara. As 10 longametraxes españois competiron polo Premio á Mellor Película Española 2023 do Festival Cine por Mujeres Madrid, que gañou El mestre que va prometre el mar de Patricia Font, dirimido por membros da Asociación Premios Blogos de Oro: María Cabal (xornalista de cinema); Diego Dá Costa (xornalista cultural) e Verónica Dávila (xornalista).
Como novidades en 2024, a programación de II Cinema por Mulleres A Coruña, arrinca cunha mesa redonda onde participarán 5 directoras galegas, con ánimo de dar visibilidade aos seus traballos e sobre todo poñer en valor o protagonismo das mulleres profesionais no recente florecemento da ficción audiovisual galega, con películas rodadas e producidas en Galicia, moitas delas rodadas en galego.
Tamén, como unha aposta pola accesibilidade das persoas xordas ou con discapacidade auditiva, o día 2 de marzo programamos unha xornada, con dous pases, cuxa presentación contará con interpretación en lingua de signos e as proxeccións faranse con subtítulos descritivos: A Singla (18.00h) e Slow (20.30h).
Con II Cinema por Mulleres A Coruña, promovido polo Concello dá Coruña, en colaboración co Festival Cine por Mujeres Madrid e o inestimable patrocinio de Sidras Maeloc, a cidade amplía a súa variada oferta cultural e a súa aposta por unha cinematografía diversa e de calidade; poñendo en valor o cinema dirixido por mulleres, e máis particularmente, as profesionais da industria cinematográfica galega.
Españolas
Internacionais
PROGRAMACIÓN
GALICIA: NÓS TAMÉN DIRIXIMOS LONGAMETRAXES
Mesa redonda: xoves 22 de febreiro de 2024, 19.00 h
Teatro Colón
Avenida da Mariña, núm. 7A, 15003 A Coruña
Iniciando o II Cinema por Mulleres, o xoves 22 de febreiro de 2024 terá lugar unha mesa redonda conformada por directoras de longametraxes galegas, ou que traballan en Galicia, principalmente procedentes da Coruña.
Directoras participantes:
- Ángeles Huerta, A Coruña
- Jaoine Camborda, San Sebastián-Santiago de Compostela
- Olga Osorio, Lugo
- Paula Cons, A Coruña
Modera: Chelo Loureiro, Ferrol. Directora e produtora de cine (Abano Producións).
Presentación: Carlota Álvarez Basso, Diego Mas Trelles (directores de Cinema por Mulleres A Coruña) e unha persoa representante do Concello da Coruña.
Máis información da mesa redonda
PROXECCIÓNS
Venres 23 de febreiro: 18.00 h
O Corno
Jaione Camborda (España)
Ficción, 103’España/Portugal/Bélxica, 2023
Illa de Arousa, 1971. María é mariscadora e coñecida por axudar a outras mulleres nos seus partos, mais debe fuxir e cruzar a fronteira por unha ruta de contrabando.
Concha de Ouro no Festival de San Sebastián
Proposta aos Premios Feroz e e Goya á Mellor actriz revelación (Janet Novás).
Presentación e coloquio posterior coa directora da película, Jaione Camborda (San Sebastián-Santiago de Compostela)
Presentan: Carlota Álvarez Basso e Diego Mas Trelles (directores de Cinema por Mulleres A Coruña).
Venres 23 de febreiro: 20.30 h
Piece of my heart (Solo queda la danza)
Dana Nechushtan (Israel/Países Baixos)
Ficción, 114’
Paises Baixos, 2022
Dúas bailarinas enfróntanse á esixencia do ballet no Ámsterdam dos 70. Unha das dúas amigas descubrirá o lado escuro do seu talento.
Seleccionada en Miami.
Estrea na Coruña.
Presentan: Carlota Álvarez Basso e Diego Mas Trelles (directores de Cinema por Mulleres A Coruña).
Sábado 24 de febreiro: 18.00 h
El mestre que va prometre el mar (O mestre que prometeu o mar)
Patricia Font (España)
Ficción, 110’
España, 2023
Baseada na historia real do mestre republicano Antoni Benaiges, entrelaza o presente e o pasado, en semanas previas ao comezo da guerra civil.
Con Enric Auquer e Laia Costa
GAÑADORA DA COMPETICIÓN ESPAÑOLA DA VI EDICIÓN DO “FESTIVAL CINE POR MUJERES MADRID”.
Seleccionada en SEMINCI, proposta aos Goya, Gaudí e premios Feroz.
Sábado 24 de febreiro: 20.30 h
How to have sex
Molly Manning Walker (Reino Unido)
Ficción, 98’
Reino Unido/Grecia/Bélxica, 2023
Tres adolescentes británicas marchan de vacacións no que debería ser o mellor verán das súas vidas, para beber, saír de festa e ligar.
GAÑADORA DA COMPETICIÓN INTERNACIONAL DA VI EDICIÓN DO “FESTIVAL CINE POR MUJERES MADRID”.
Premiada con “Un Certain Regard Award” en Cannes, premio European Discovery-Fipresci en European Film Academy, premiada en Chicago, SEMINCI, seleccionada nos festivais de Jerusalem, Melbourne, Zúric e Atenas, entre outros.
Presentan: Carlota Álvarez Basso e Diego Mas Trelles (directores de Cinema por Mulleres A Coruña).
PROXECCIÓNS
Mércores 28 de febreiro: 18.00 h
Chinas
Arantxa Echevarría (España)
Ficción, 118’
España, 2023
Tres mozas de orixe chinesa viven en Madrid con realidades opostas. As súas historias crúzanse e sepáranse, mais manteñen en común a procura da identidade.
Con Carolina Yuste e Leonor Watling.
Seleccionada en San Sebastián, proposta aos Goya.
Mércores 28 de febreiro: 20.30 h
Temps mort (Time Out)
Eve Duchemin (Bélxica)
Ficción, 118’
Benelux/Francia, 2022
Por primeira vez en moito tempo, a tres recluídos concédeselles un permiso de fin de semana. En corenta e oito horas terán que recuperar o tempo perdido.
Seleccionada no Festival de Pequín.
Estrea na Coruña.
Xoves 29 de febreiro: 18.00 h
Creatura
Elena Martín Gimeno, España
Ficción, 112’
España, 2023
Mila decátase de que as razóns da súa perda de desexo están en si mesma… unha viaxe ao espertar sexual da infancia e a libido feminina.
Premiada na Quinzaine de Cannes, premio Dunia Ayaso da Fundación SGAE, proposta aos Goya, Gaudí e premios Feroz.
Estrea na Coruña
Xoves 29 de febreiro: 20.30 h
Ha Pilegesh (The Other Widow)
Ma'ayan Rypp (Israel)
Ficción, 83’
Israel, 2023
Ella sofre a repentina morte do seu amante e mergúllase no seu shivá, un universo que lle estaba vetado, onde acabará esixindo o seu lexítimo dereito ao loito.
Premiada no Sofia International Film Festival, seleccionada en Calgary, Santa Bárbara, Jerusalem, Tällinn, Sarasota etc.
Estrea na Coruña.
Venres 1 de marzo: 18.00 h
El sueño de la sultana
Isabel Herguera (España)
Animación, 80’
España/Alemaña, 2023
Inspirada nun conto feminista escrito en Bengala en 1905, Inés emprende unha viaxe iniciática pola India na procura da utópica Terra das Mulleres.
Premio Asociación Vasca de Guionistas en San Sebastián, proposta aos Goya, Gaudí e premios Feroz.
Estrea na Coruña.
Presentación e coloquio posterior coa produtora da película, Chelo Loureiro (Ferrol)
Venres 1 de marzo: 20.30 h
El eco
Tatiana Huezo (México/El Salvador)
Documental, 102’
México, 2023
Na remota vila mexicana de El Eco, a precariedade e o traballo definen a vida. Os nenos aprenden sobre a morte, a enfermidade e o amor.
Gañadora de Mellor Dirección e Mellor Documental en Berlinale; Mellor Documental en Jerusalem; seleccionada nos festivais de Hong Kong, Seattle, Chicago, Morelia, Vision du Réel, San Sebastián etc.
Sábado 2 de marzo: 18.00 h
La Singla
Paloma Zapata (España)
Documental, 95’
España/Alemaña, 2023
Proxección con subtítulos descritivos.
A película parte en busca da Singla, bailaora de flamenco, xorda, famosa internacionalmente con 17 anos e que de súpeto desaparece da escena.
Seleccionado en Málaga, DocsBarcelona, Sevilla, Hot Docs, Doxa, Thessaloniki, Guadalajara, Cracovia. Premio Feroz Arrebato de non ficción.
Estrea na Coruña.
Proxección con subtítulos descritivos e interpretación da presentación en lingua de signos.
Sábado 2 de marzo: 20.30 h
Slow
Marija Kavtaradze (Lituania)
Ficción, 108’
Lituania, España, Suecia, 2023
LGTBIQ+
Cando Elena e Dovydas se coñecen, establecen un fermoso vínculo que será posto a proba cando Dovydas confesa a súa asexualidade.
Premio a Mellor dirección-drama en Sundance, premiada en Gante, Tällin, Arras, seleccionada en Zúric, Atenas, Reykjavik e Atlántida Film Fest.
Proxección con subtítulos descritivos e interpretación da presentación en lingua de signos.
PROXECCIÓNS
Mércores 6 de marzo: 18.00 h
20.000 Especies de abejas
Estibaliz Urresola Solaguren (España)
Ficción, 129’
España, 2023
LGTBIQ+
Cocó non entende por que todos ao seu redor insisten en chamala Aitor. A súa familia irá de vacacións á casa da avoa, onde a súa tía cría abellas.
Premiada en Berlinale, Guadalaxara, Hong Kong, Málaga, Seattle, San Francisco e Premio Forqué. Premio Feroz á Mellor película dramática, Mellor actriz de repartición (Patricia López Arnaiz). Premios Goya a Mellor dirección novel, Mellor guión orixinal e Mellor actriz de repartición (Ane Gabarain).
Mércores 6 de marzo: 20h30
La memoria infinita
Maite Alberdi (Chile)
Documental, 85’
Chile, 2023
Augusto e Paulina estiveron xuntos durante 25 anos, ambos lidan co medo ao momento no que el (xornalista recoñecido) non volva recoñecer a Paulina.
Gañadora do Premio World Cinema - Documentary en Sundance, Mellor Documental en Minneapolis St Paul, Mellor película latinoamericana en Premios Forqué, seleccionada en Berlín, Atenas, Dallas, Miami, DocAviv, San Sebastián. Goya á Mellor película iberoamericana.
Estrea na Coruña.
Xoves 7 de marzo: 18.00 h
Vasil
Avelina Prat, (España)
Ficción, 92’
España/Bulgaria, 2022
Vasil é moi bo ao bridge e ao xadrez pero dorme na rúa ata que un xubilado apaixonado do xadrez o acolle na súa casa.
Con Iván Barnev e Karra Elejalde
Premio ex aequo Mellor Actor en SEMINCI e gañadora dos Premios Berlanga en Valencia. Proposta aos Premios Feroz e Gaudí.
Xoves 7 de marzo: 20h30
Sluzka (The Chambermaid)
Mariana Čengel Solčanská (Eslovaquia)
Ficción, 100’
Eslovaquia, República Checa, 2022
LGTBIQ+
Película de época, na que dúas mozas nos extremos opostos da escala social do imperio austro-húngaro se converten en mellores amigas e amantes.
Seleccionada en Chicago e Tällinn.
Estrea na Coruña.
Venres 8 de marzo: 18.00 h
Las buenas compañías
Silvia Munt (España)
Ficción, 103’
España/Francia, 2023
LGTBIQ+
Bea únese a un grupo feminista, no que, xunto ás súas compañeiras, desafiará a legalidade por vivir nun mundo máis xusto. Baseada en feitos reais.
Premio do Público do Festival de Dereitos Humanos de San Sebastián e do Jurado Joven en Málaga, proposta aos Premios Gaudí.
Estrea na Coruña.
Venres 8 de marzo: 20h30
Animalia
Sofia Alaoui (Francia/Marrocos)
Ficción, 91’
Marrocos/Catar/Francia, 2023
Itto, embarazada, adáptase á opulencia da súa nova familia. Co seu home de viaxe, enfróntase a un misterioso estado de emerxencia declarado en todo o país.
Gañadora do premio especial á Visión Creativa en Sundance, seleccionada en Hong Kong, Munich, San Francisco, Istambul, Munich e Guanajuato, entre outros.
Estrea na Coruña.
Sábado 9 de marzo: 18.00 h
¡Salta!
Olga Osorio (España)
Ciencia ficción familiar, 85’
España, 2023
É o verán de 1989. Dous irmáns, moi distintos entre si, viaxan no tempo saltando polos buracos de verme.
Con Marta Nieto e Tamar Novas.
Presentación e coloquio posterior coa directora da película, Olga Osorio (Lugo)
Sábado 9 de marzo: 20h30
Past lives (Vidas pasadas)
Celine Song (Corea del Sur/Canadá)
Ficción, 105’
Estados Unidos, 2023
Nora e Hae Sung, dous amigos da infancia, son separados despois de que a familia de Nora emigrase de Corea do Sur. Vinte anos despois, reúnense en Nova York para enfrontarse ao amor e ao destino.
Seleccionada nos festivais de Sundance, Berlín, Sydney, Jerusalem, Saraievo, Deauville, Gante, obtivo numerosos premios da crítica estadounidense, entre eles o de Mellor Película Independente de 2023.
Editorial
DAS IRMÁS MAIORES: UNHA PROPOSTA DE LIÑA DO TEMPO DO CINEMA ESPAÑOL DIRIXIDO POR MULLERES
A escritora alxeriana Brigitte Girauden nun artigo recente falaba da súa “irmá maior literaria”: Annie Ernaux. Sinalaba o seu agradecemento a escritoras previas que abriron novos camiños, que se enfrontaron a unha sociedade inxusta e que lles permitiron a outras mulleres dar o primeiro paso para acabar co status quo. Decidimos dedicarlles este editorial a esas irmás maiores do cinema español, tomando como referencia a cronoloxía elaborada polo crítico cinematográfico Carlos Heredero[1]. Nela debúxanse claramente tres períodos diferenciados, aos que nos permitimos engadir unha cuarta etapa e démoslles un nome a todas elas.
Desde o ano 1897 (data de produción da que se considera a primeira película española, de Eduardo Jimeno, Salida de misa de doce de la Iglesia del Pilar de Zaragoza), ata o ano 1989, sería a “Idade de Ferro”, porque durante 92 anos só houbo 16 mulleres directoras: Elena Jordi (pseudónimo de Monserrat Casals), Helena Cortesina, Rosario Pi Brujas, Ana Mariscal, Margarita Alexandre, Helena Lumbreras, Mercé Conesa, Josefina Molina, Pilar Miró, Cecilia Bartolomé, Isabel Mulá, Virginia Nunes, Pilar Távora, Cristina Andreu, Isabel Coixet e Ana Díez.
Entre 1990 e 1999, a “Idade de Bronce”, na que debutaron 29 directoras máis, citadas por orde alfabética [2]: Ana Belén, Ana Simón Cerezo, Arantxa Lazcano, Azucena Rodríguez, Chus Gutiérrez, Cristina Esteban, Dolors Payás, Dunia Ayaso, Eugenia Kléber, Eva Lesmes, Gracia Querejeta, Icíar Bollaín, Isabel Gardela, Judith Colell, Maite Ruiz de Austri, Manane Rodríguez, Mar Targarona, María Miró, María Ripoll, Marta Balletbó-Coll, Mireia Ros, Mirentxu Purroy, Mónica Laguna, Nuria Olivé-Bellés, Nuria Villazán, Pilar Sueiro, Rosa Vergés, Teresa Pelegri e Yolanda García Serrano.
A “Idade de Cobre”, entre os anos 2000 e 2016, comeza cando, segundo a listaxe coordinada por Andrea Morán Reyes e Jara Yáñez[3], mentres, afortunadamente, a xeración anterior segue en activo. Durante a primeira década dos 2000, incorpórase ao sector profesional unha frutífera promoción de profesionais de traxectoria e formación moi heteroxénea, sen complexos, cunha mirada propia, que puxeron en cuestión os roles sociais, con protagonistas que asumen as súas decisións e difiren dos estereotipos vixentes: nin compracentes, nin vítimas, nin nais abnegadas, nin verdugos, nin submisas. En definitiva, propoñen un relato da muller sen clixés, sen tópicos e sen canons. É imposible dar nomes propios sen cometer inxustos esquecementos, pero imos facer un intento por orde de debut: Patricia Ferreira, Laura Mañá, Cecilia Barriga, Helena Taberna, María Lidón, Inés París, Daniela Fejerman, Silvia Munt, Ángeles González-Sinde, Mercedes Álvarez, Margarita Ledo, Marta Arribas e Ana Pérez de la Fuente, Ariadna Puyol, Nely Reguera, Arantxa Aguirre, Roser Aguilar, Mabel Lozano, Carla Subirana, Belén Macías, Isona Passola, Anna Bofarrul, Mar Coll, Carlota Lelson, Elena Trapé, Juana Macías, Meritxell Soler, Paula Ortiz, Sonia Tercero, Susana Guardiola, Dácil Pérez de Guzmán, Giovanna Ribes, Eva Vila, Pilar Pérez Solano, Neus Ballús, Silvia Benegas, Diana Toucedo, Carolina Astudillo, Amparo Climent, Mercedes Muncada, Leticia Dolera e Andrea Jaurrieta… entre outras.
Segundo o noso criterio, a partir do 2015, podería empezar a “Idade de Prata” cando unha recente promoción de cineastas se aliña como se fose un colectivo, aínda que sen fito fundacional, sen sede e sen nome (aínda). Con todo, teñen un común denominador: as súas longametraxes deron gratas noticias desde o punto de vista dos galardóns nacionais e internacionais; as súas películas falan sobre o presente e o pasado recente dunhas protagonistas que toman a renda das súas vidas e queren romper coas convencións narrativas, e apelan a un público mixto e xeneralista. Referímonos a directoras con múltiples premios como (por orde alfabética): Alauda Ruiz de Azúa, Alba Sotorra, Almudena Carracedo, Arantxa Echevarría, Belén Funes, Elena Martín, Lucía Alemani, Paula Palacios, Pilar Palomero, Carlota Pereda, Clara Roquet e Carla Simón, entre outras. A estas uniuse hai apenas uns días, Jaione Camborda, primeira directora española en gañar a Cuncha de Ouro.
Tamén lles quixemos botar unha ollada aos festivais, mostras ou ciclos de cinema realizados por mulleres que, dende hai décadas, se realizan periodicamente no territorio español. Empezamos polo mítico “Festival Internacional de Cine Realizado por Mujeres” que se celebrou en Madrid entre 1984 e 1996, promovido polo Ateneo Feminista (co que me impliquei persoalmente entre 1992 e 1996); “Muestra de Cine y Mujeres de Pamplona”, que se celebra desde 1987, con 37 edicións ás súas costas; “Mostra Internacional de Films de Dones de Barcelona”, con 31 edicións desde 1993; “Muestra de Cine Dirigido por Mujeres de Bilbao”, con 27 edicións ás súas costas; “Muestra Internacional de Cine Realizado por Mujeres” de Zaragoza, con 25 edicións; “Muestra de Cine Realizado por Mujeres de Huesca”, con 23 edicións; “Bienal Internacional Dona i Cinema de Valencia”, que se celebra desde o 2011. Cabe mencionar outras iniciativas máis recentes como “Cima en corto”, desde 2006, unha mostra de curtametraxes organizada por CIMA (Asociación de Mujeres Cineastas y de Medios Audiovisuales); “Mujeres de Cine”, a mostra itinerante que nace en Madrid en 2010 ou o Festival “Dirección en Femenino” de Aranjuez, con VI edicións. Esperamos non deixar ningún no tinteiro e estaremos encantadas de emendar posibles erros e de completar esta información.
A teor dos resultados dos últimos anos, podemos intuír que estamos a entrar na “Idade de Ouro” da dirección de cinema por mulleres en España, pero iso só poderemos afirmalo cando cheguemos a uns datos próximos á paridade.
Valla este texto para lles expresar o noso agradecemento a estas “irmás maiores”, tanto a directoras como ás profesionais dos festivais, por achandar o camiño a moitas outras.
Carlota Álvarez Basso e Diego Mas Trelles
Directores de ll Cinema por Mulleres A Coruña
[1] Datas establecidas segundo a cronoloxía elaborada polo crítico cinematográfico Carlos Heredero no seu artigo “Directoras españolas del siglo XXI. Un combate por el equilibrio”. Feminino Plural. Mujeres Cineastas del siglo XXI. Carlos F. Heredero. Caimán Cuadernos de cine, ed. 2017.
[2] Idem.
[3] “Películas españolas dirigidas por mujeres españolas (2000-2016)”. Femenino Plural. Mujeres Cineastas del siglo XXI”. Coordinado por Andrea Morán Reyes e Jara Yáñez. Caimán Cuadernos de cine, ed. 2017.
CRÉDITOS
PROMOVE: Concello da Coruña
PATROCINA: Maeloc
PRODUCE: Limbo Producciones S.L.
EQUIPO MOSTRA
DIRECCIÓN:
Carlota Álvarez Basso e
Diego Mas Trelles
COMITÉ DE PROGRAMACIÓN:
Elena Manrique, María Angulo
PRODUCCIÓN XERAL MADRID:
María Collado
COMUNICACIÓN E REDES:
Elena López
PRESENTADORA NA CORUÑA:
Andrea Franco
DESEÑO:
El vivero
WEBMASTER:
Bonaval Multimedia, Vigo
PRENSA E COMUNICACIÓN:
Prismaideas
Contacto:
Este enderezo de correo está a ser protexido dos robots de correo lixo. Precisa activar o JavaScript para velo.
Tel. +34 660 573 049